由睇到哩篇野同高登幾個POST之後，我有點灰心，覺得原來無人再信BLOGGER既介紹了，我反問自己到底點解我想做YOUTUBER／BLOGGER？從由一個小小既VIEWER，見到好用既產品就狗衝一定要買，用左幾次之後真係覺得唔好用就放埋一邊直至扔落垃圾桶，我就想自己可以做到一個唔係咩都SELL既BLOGGER，而係做到真心分享既人，拍片分享好物，唔係最好用都唔介紹係我的宗旨。希望我哩個熱誠可以KEEP到，為自己興趣又好，我只想無悔，因為人生得一次，哩樣係我一直想做的事。
我無做"廣告blogger"快將一年了。
對上一個product placement YouTube video係去年9月嘅Philips洗面機，真心幾好用，問題只係的唔的得起心肝用。 這一年間，我每次登台來回三日勁歌熱舞，同我拍一段假分享video賺嘅錢一樣，但我的良心輕鬆愉快多了。可能我有一份收入穩定的工作, 有自己的品牌，沒接這類型工作對我影響不大，但真正原因，是因為beauty blogger 一行，有如model界一樣，已直插谷底，如泡沫爆破。
我每一次被邀請，都必先和客顧開會，「喂你枝粉底真心好lup, 不如主力sell 平？」「你枝唇膏真係好乾，不如討論下性價比」問清楚成分，自己試用過再隱惡揚善，連激光脱毛都俾我由波長同原理問起，雖然未必得到客戶或者agency認同，但總算過到自己。試過一次，度好角度，諗好成個包裝，提議埋橋段，錢都收埋片都出埋街，點知同時有七個blogger 以同一橋段sell 同一產品，此時，我知道我應該離開了。當然，隨後我開的辣爆條件接近全香港agency都唔會再搵我，但係，我當客戶唔識，你地都知咁sell法係幫唔到個産品？點解咁樣一齊去摧毀個product會過到自己？
此外，任何真心分享，朋友有好産品但無人識，都唔再得到觀眾認同，就連大拿拿俾左萬二蚊學車嘅駕駛學院，都會被懷疑product placement,其實，人地只係包容我無限改時間，已經好抵讚。
呢個風氣，令全香港都多左份疑心，少左份感激。
其實，近所有女星、blogger都會收到每個品牌新product, 我選擇以感謝之情post禮物照，遇到有客戶邀請product placement廣告, 我同樣會繼續開我啲辣爆條件(唔係個價錢，係要雙方認同點樣去sell個産品，點解你係最好，如果你唔夠人好，會唔會講下下性價比) ，有緣人自然可以合作。而且，好似蔡太、針清王、雙眼皮貼，如果我收佣金，我就發死了，但係我認為， 真心好，我分享左，姊妹們有得著，已經係一個Beaty blogger最大成就。
香港地，搵食艱難，然而絶處逢生有一班靠寫專欄，拍片為生嘅網絡紅人，成本極低（當然要有一定才華，例如presentation skills），可能買下器材、粉絲量同點擊率，方便同客戶叫價，但係呢個低成本工作如果成為正職，好容易形成歪曲的價值觀。
有人問我，呀邊個blogger product placement 賺十幾萬一個月，呀邊個介紹人去做facial收30萬佣....哇...聽落我好蝕底，但係，有種快樂和成就感，錢是買不到的。
姊妹們，共勉之。
Search